என்ன வித்தியாசம் சுனாமிக்கும் நமக்கும்......

மனதுமறக்காத நாளானது
மார்கழி இருபத்தாறு
துறைமுக அலை
துயரத்தின் பேரலையானது
ஆழிப்பேரலை நம்
ஊரை உலுக்கியது
உறவுகளைப் பிரித்து
உடமைகளை உருக்குலைத்தது.


இயற்கையால் வந்ததினால்
இழப்புகளின் விபரங்கள்
மூடிமறைப்பில்லாது
இயல்பாக (வெளி) வந்ததது.
அதிகார வர்க்கங்களும் கொஞ்சம்
அதிர்ந்துதான் போயின
கோசங்கள் தாண்டி
வாழ்தலுக்கான போராட்டத்தின்
வலிதனை உணர்ந்தன

சமாதான, சகோதரத்துவ
வாழ்வுபற்றிய சலனங்கள்
அடிமட்ட மக்களுக்குள்
அகலக்கால் பதித்தன
இழப்புகள் பெரிதாய் வரும்வரை
புரிவதில்லை உயிர்
இருப்புகளின் பெறுமதி
நம்பிக்கை வந்ததது
முரண்பாடுகள் நீங்கி
வருங்காலம் நமக்கு
வழமாய் அமையுமென்று

ஞாபகப்படுத்துங்கள் இந்த
நான்காண்டுக்குள்
நாம்பார்த்த அழிவுகள் எத்தனை
கொஞ்சம் யோசியுங்கள்
வாசிக்கக்கிடைத்த
வன்மங்கள் எத்தனை
உதிரம் தோய்ந்த உலகில்
உடமையழிவுக்கேதும் கணக்கிருக்கா?

மறக்கவிடாமல் அடிக்கடி
வருவதாய்ச் சொல்கிறார்கள்
சுனாமி - இருந்தும் நான்
தேடிக்கொண்டிருக்கிறேன்
அன்றோடு தொலைந்துபோன
அன்புள்ளங்களை......
நெஞ்சிலடித்து
கடலுக்குச் சாபமிட்டவர்களே
சொல்லுங்கள்....

என்ன வித்தியாசம்
சுனாமிக்கும் நமக்கும்

த.ஜீவராஜ்

இந்த தகவல்கள் உங்களுக்கு பயனுள்ளதாக இருந்தால் சமூக தளங்களில் பகிர்ந்து உங்கள் நண்பர்களுக்குத் தெரியப்படுத்துங்கள்....