மீள்குடியமர்வு

சொல்லிலடங்காத
சோகங்களின்
தொகுப்பு


பட்டவர் அன்றி
மற்றவர் புரிந்திடா
உணர்ச்சிகளின் குவியல்

கூரைபிளந்து
வானம் பார்த்திருக்கும்
வீடு

செடிகொடி வளர்ந்து
காடாய்க் கிடக்கும்
வளவு

குதுகலத்தோடு வாழ்ந்த
குடிதனின் நிலைகண்டு
குளமாகும் கண்கள்

அடியெடுத்துவைக்கையில்
அன்னியப்படும்
பயிர் நிலங்கள்

சிறப்பாய் வாழ்ந்த நாட்கள்
சிந்தையில்
வட்டமிட்டிட

சின்னதில் செய்திட்ட
குறும்பினைச் சொல்லிடும்
சுவர்கள்

இருப்புக்கும்
இழப்புக்குமிடையில்
அல்லல்ப்படும் மனம்

சிரிப்பும், அழுகையும்
சேர்ந்தேவரும் - ஆம்
மீள்குடியமர்வென்பது எங்களுக்கு

மரணிப்புக்கு
முன்னால் கிடைக்கும்
மறுபிறப்பு.
த.ஜீவராஜ்

இந்த தகவல்கள் உங்களுக்கு பயனுள்ளதாக இருந்தால் சமூக தளங்களில் பகிர்ந்து உங்கள் நண்பர்களுக்குத் தெரியப்படுத்துங்கள்....